Markmið stjórnar Vátryggingafélags Íslands hefur verið að gera félagið að enn vænlegri fjárfestingakosti á markaði með skýra sýn á vöxt, þróun og fjármagnsskipan. Eignastýringafélagið SIV, sem var stofnað í lok árs 2022, fékk starfsleyfi um mitt ár 2023. Þetta var hluti af stefnumörkun stjórnar — og fyrsta skrefið í að víkka út starfsemi félagsins á fjármálamarkaði. Með sameiningu VÍS og Fossa á síðasta ári varð svo til framsækið og öflugt fyrirtæki á fjármálamarkaði með víðtækar starfsheimildir. Saman mynda þessi félög sterka heild þar sem áherslan er lögð á framúrskarandi þjónustu og traust langtímasamband við viðskiptavini. Skagi er nýtt afl á fjármálamarkaði.

Athygli er vakin á því að lögheiti félagsins er Vátryggingafélag Íslands hf. Tillaga um nafnabreytingu í Skagi hf. verður lögð fram á aðalfundi félagsins þann 21. mars 2024.

Í samstæðunni eru þrjú sjálfstæð dótturfélög; VÍS tryggingar, Fossar fjárfestingarbanki og SIV eignastýring.

Lögð er áhersla á framúrskarandi þjónustu og traust langtímasamband við viðskiptavini. Enn fremur er samstæðan í fararbroddi þegar kemur að tengingu íslensks atvinnulífs við alþjóðlegt fjárfestingarumhverfi.

Heildarvelta á markaði dróst almennt saman á síðasta ári og var velta með bréf VÍS þar ekki undanskilin. Heildarvelta með bréf félagins í Kauphöllinni voru tæpir 22 milljarðar og dróst saman um 34% milli ára. Dagleg meðalvelta var um 87,6 milljónir króna og dróst saman um 34% milli ára. Fjöldi viðskipta voru 1.905 talsins á síðasta ári. Gengi bréfa félagsins í upphafi árs var 16,9 og lok árs 17,1 — og hækkaði því um eitt prósent á síðasta ári. Markaðsvirði félagsins var 32,6 milljarðar í lok árs 2023 en 29,6 milljarðar árið áður og hækkaði því um 10% á síðasta ári.

Á síðasta ári var greiddur arður að fjárhæð 951 milljón króna, en að teknu tilliti til eigin bréfa voru 939 milljónir króna greiddar til hluthafa. Hluthafar voru 934 í ársbyrjun og 913 í árslok 2023.

Í stjórn félagsins sitja þau Stefán H. Stefánsson, stjórnarformaður, Vilhjálmur Egilsson, varaformaður, Guðný Hansdóttir, Marta Guðrún Blöndal og Ásgeir Helgi Reykfjörð Gylfason. Varamenn eru þau Sveinn Friðrik Sveinsson og Ragnheiður Hrefna Magnúsdóttir.