Árangur í fjárfestingum á síðasta ári var sá allra besti frá skráningu félagsins. Fjárfestingatekjur ársins 2021 námu 8,3 milljörðum króna eða 18,7% nafnávöxtun — en þess má geta að árið 2020 var áður besta ár félagsins í fjárfestingum með 5,1 milljarð króna í fjárfestingatekjur og 14,0% nafnávöxtun.

Stærstur hluti fjárfestingatekna ársins kom frá virðishækkunum hlutabréfa. Skráð hlutabréf hækkuðu um 5,0 milljarða króna, sem jafngildir 53,4% nafnávöxtun — en til samanburðar hækkaði OMXIGI hlutabréfavísitalan um 42,1% á árinu. Óskráð hlutabréf hækkuðu einnig talsvert á árinu eða um 1,8 milljarð króna og jafngildir það nafnávöxtun upp á 47,3%. Óskráð hlutabréfasafn félagsins hefur tekið miklum breytingum undanfarin ár með fjárfestingum í fyrirtækjum á borð við Controlant, Kerecis, Bláa lóninu og Coripharma sem hefur skilað sér í góðri ávöxtun á árinu 2021.

Fjárfestingatekjur skuldabréfa voru öllu minni en þar töldu önnur skuldabréf mest með rúma 0,6 milljarð króna, sem er 5% hækkun, en aðrir flokkar skiluðu minna.

VÍS var fyrsta tryggingafélagið á Íslandi til þess að verða aðili að UN-PRI á síðasta ári, reglum Sameinuðu þjóðanna um ábyrgar fjárfestingar. Í gegnum eignasafn sitt hefur félagið mikil áhrif. Með því að taka tillit til sjálfbærniþátta í fjárfestingum lágmarkar félagið áhættu tengda sjálfbærnimálum — á sama tíma og það virkjar önnur félög til betri starfshátta.

Heildarvelta með bréf félagins í Kauphöllinni var tæpir 43 milljarðar og jókst lítillega milli ára — eða um 2,2%. Dagleg meðalvelta var um 171 milljón króna og jókst um 1,8% milli ára. Fjöldi viðskipta jókst um 1,4%. Gengi bréfa félagsins í upphafi árs var 14,4 og lok árs 20,4.  Markaðsvirði félagsins jókst því um 42% á árinu 2021 — það fór úr 27 milljörðum árið 2020 í 39 milljarða á árinu 2021.

Á síðasta ári var greiddur 1,6 milljarður króna arðgreiðsla til hluthafa, auk þess sem félagið keypti 144.462.192 eigin hluti með framkvæmd endurkaupaáætlana. Hluthafar voru 709 í ársbyrjun og 871 í árslok.