Ávarp forstjóra Fossa
Sterkari sem aldrei fyrr
Árið 2023 var sögulegt ár í starfsemi Fossa fjárfestingarbanka. Sameiningin við VÍS styrkti bankann verulega á síðasta ári. Ytra umhverfi var ekki hagfellt þar sem stýrivaxtahækkanir lituðu árið, annað árið í röð. Við nýttum tækifærið og brýndum okkur fyrir betri tíma og lögðum áherslu á að safna saman úrvalsliði. Það urðu svo vatnaskil í rekstri bankans þegar sameiningin var frágengin í byrjun október. Fjármögnunarkostnaður lækkaði í takt við væntingar okkar.
Aukið eigið fé, sem kom frá nýjum eigendum bankans, veitti bankanum byr undir báða vængi og reyndist sérstaklega hagfellt fyrir eigin viðskipti bankans. Aðstæður á markaði urðu einnig betri undir lok árs og náði bankinn að veita kröftuga viðspyrnu, líkt og kemur fram í rekstrarniðurstöðu á fjórða ársfjórðungi. Rekstur Fossa með nýjum tekjusviðum bankans hefur skilað auknum tekjum og gefur góð fyrirheit fyrir framhaldið. Rekstrarniðurstaða af fjármálastarfsemi á fjórða ársfjórðungi er tap upp á fjórar milljónir króna eftir skatta. Nýtt ár byrjar af miklum krafti.
Bankinn flutti í nýjar höfuðstöðvar í Ármúla og er nú er öll samstæðan undir sama þaki. Þetta hefur reynst mikið heillaskref og haft frábær áhrif á starfsemina, og ekki síst starfsfólkið. Að sama skapi beindum við sjónum á að styrkja innviði bankans á síðasta ári. Ný framkvæmdastjórn bankans tók einnig til starfa og við erum með framúrskarandi hóp starfsfólks. Við hlökkum því til komandi tíma með nýjum tækifærum og áskorunum. Við ætlum að grípa tækifærin, nú sterkari sem aldrei fyrr.
Steingrímur Arnar Finnsson
Forstjóri Fossa fjárfestingarbanka